Ahmet Yesevi Hikmet – 88 Şiiri

featured
Paylaş

Bu Yazıyı Paylaş

veya linki kopyala

HİKMET-88

Muhabbetni câmın içib raks eylegen
Divâneliğ makâmığa kirdi dostlar
Aç u tokluk sûd u ziyân hiç bilmegen
Sermest bolup raks u semâ urdı dostlar

Raks u semâ urganlarga dünyâ harâm
Ehl ü ayâl hânumândın keçti tamâm
Seher vaktda Hakk’a sığnıp yığlar müdâm
Andın songra raks u semâ urdı dostlar

Raks u semâ urgan aşık özin bilmes
Bîhuş yürer dünya malın kolğa almas
Yüzming âdem taksir dese mağrur bolmas
Dünya tefip raks u semâ urdı dostlar

Dünyâ tefmey raks u semâ urgan câhil
Hak yâdını bir dem aytmay yürür ğafil
Dervişmen der dünyâ sarı köngli mâyil
Dünya üçün raks u semâ urdı dostlar

Özdin ketmey raks u semâ urmak hata
Sübhân İgem anga kılmas imân atâ
Tâat kılsa dillerini kılmas safa
Riyâ kılıp raks u semâ urdı dostlar

Vay uşandağ nâdânlardın ümit kılmang
Feyz fütûh alurmen dep yügrüp almang
Nefsi uluğ şer’i buzuğ veli bilmeng
Şeytan lain nohta urmay mindi dostlar

Özdin ketmey raks eylese Allah bizâr
Semâıdın yer tebrenip tartkay âzâr
Duâ kılay körsetmesün anga didâr
Dindin keçip raks u semâ urdı dostlar

Divaneliğ galib kelmey sema urar
Hak Mustafa çehar-yârdın bizâr yörer
Baştın ayağ günahları hazır turar
Günah tilep raks u semâ urdı dostlar

Şibli âşık semâ urdı pertev körüp
Mustafa’nı hâzır körüp seval sorup
Dünyâ ukbın arka taşlap közin yumup
Andağ kullar raks u semâ urdı dostlar

Şibli âşık yığlab aydı “Eyâ Resul
Bi-tâkatmen semâ ursam hem men melul”
Resül aydı “İnşâallâh kılğay kabul”
Ruhsat tilep raks u semâ urdı dostlar

Kul Hace Ahmed raks u semâ her kimge yok
Taklid birle ursa semâ kirgey tamuğ
Bu rivâyet pinhan erdi aytsam kamuğ
Haknı tapıp raks u semâ urdı dostlar

E-posta hesabınız yayımlanmayacak. Gerekli alanlar * ile işaretlenmişlerdir