Behîşt duzeh talaşur talaşmakda beyân bar
Duzeh aytur mîn artuk mînde Fîr‘avn Hâmân bar
Behîşt aytur nî dîrsîn söznî bîlmey aytursîn
Sînde Fîr‘avn bar bolsa mende Yûsuf Ken‘ân bar
Duzeh aytur mîn artuk bahîl kullar mînde bar
Bahîllernî boynıda otlug zencîr-keşân bar
Behîşt aytur mîn artuk peygamberler mînde bar
Peygamberler aldıda Kevser hûr u gılmân bar
Duzeh aytur mîn artuk tersâ cühûd mînde bar
Cahûd tersâ aldıda türlüg azâb-sûzân bar
Behîşt aytur mîn artuk mü’mîn kullar mînde bar
Mü’mînlernîng aldıda türlüg nî‘met-elvân bar
Duzeh aytur mîn artuk zâlîm kullar mînde bar
Zâlîmlerge bîrürge zehr ü zakkûm çendân bar
Behîşt aytur mîn artuk âlîm kullar mînde bar
Âlîmlernî könglîde âyet hadîs Kur’ân bar
Duzeh aytur mîn artuk münâfıklar mînde bar
Münâfıklar boynıda otdın îşkîl-keşân bar
Behîşt aytur mîn artuk zâkîr kullar mînde bar
Zâkîrlernî könglîde zîkr ü fîkr-î Sübhân bar
Duzeh aytur mîn artuk bî-namâzlar mînde bar
Bî-namazlar boynıda yılan bîlen çıyan bar
Behîşt aytur mîn artuk dîdâr körmek mînde bar
Dîdârın körsetürge Rahîm atlıg Rahmân bar
Duzeh anda dîk turdı behîşt özrînî aydı
Hâce Ahmed nî bîldî bîldürgüçî Yezdân bar
